Eignastýring Íslenskra verðbréfa veitir sérsniðna eignastýringu fyrir lífeyrissjóði, tryggingafélög og aðra stofnanafjárfesta. Þá annast eignastýring Íslenskra verðbréfa einnig stýringu eigna þeirra viðskiptavina sem gert hafa eignastýringarsamning við Fossa fjárfestingarbanka hf., systurfélag Íslenskra verðbréfa hf. (https://fossar.is/eignastyring/).

Teymi eignastýringar Íslenskra verðbréfa samanstendur af sérfræðingum í hverjum eignaflokki með mikla reynslu af virkri stýringu eigna. Áhersla er á virka stýringu með það að markmiði að ná stöðugum langtímaárangri.

Eignastýring stofnanafjárfesta byggir á faglegum og markvissum vinnubrögðum. Stýringin fer fram í samræmi við fyrir fram skilgreinda fjárfestingarstefnu, markmið og vikmörk sem mótuð eru í nánu samráði við viðskiptavini.

Fyrir frekari upplýsingar um eignastýringu stofnanafjárfesta, hafðu samband með því að senda tölvupóst á eignastyring@iv.is

Starfsfólk okkar hefur yfirgripsmikla þekkingu og reynslu af fjármálamörkuðum. Markmiðið er framúrskarandi ávöxtun og árangur. Reynsla, þekking og árangur eru þau gildi sem við störfum eftir.

Fréttasafn

Stjórn Íslenskra verðbréfa hefur samþykkt að sameina ÍV Stokk hs. og ÍV Hlutabréf hs. 

Tilkynning um fyrirhugaðan samruna ÍV Stokks hs. og ÍV Hlutabréfa hs. 

Stjórn Íslenskra verðbréfa hefur samþykkt að sameina ÍV Stokk hs. og ÍV Hlutabréf hs. (hét áður SIV Hlutabréf). ÍV Hlutabréf er yfirtökusjóður og ÍV Stokkur er samrunasjóður. 

Reglur og fjárfestingarstefna ÍV Hlutabréfa haldast óbreyttar. Samruninn hefur hlotið samþykki Fjármálaeftirlits Seðlabanka Íslands og mun taka gildi 17.12.2025.  

Tilkynning til hlutdeildarskírteinishafa IV Stokks og ÍV Hlutabréfa hs.pdf

Tilkynningar um fyrirhugaðar breytingar voru sendar sjóðfélögum sjóðanna 13.11. 2025. Tilkynninguna má nálgast hér.  

Sé óskað frekari upplýsinga er bent á að hafa samband í gegnum iv@iv.is eða í síma 460 4700.

Íslensk verðbréf hf. hefur stofnað sjóðinn SIV Credit Fund II slhf. 

Nýr sjóður um fjármögnun fyrirtækja

Íslensk verðbréf hf. hefur stofnað sjóðinn SIV Credit Fund II slhf. Sjóðurinn er samlagshlutafélag sem hefur það markmið að fjárfesta í skuldabréfum og lánum til fyrirtækja, að mestu með veði í fasteignum og öðrum fastafjármunum. Heildaráskriftarloforð sjóðsins nema 12,6 milljörðum króna og eru eigendur sjóðsins margir af stærstu fagfjárfestum landsins. 

Framkvæmdastjóri sjóðsins er Þorkell Magnússon, sem jafnframt er forstöðumaður sjóðastýringar hjá Íslenskum verðbréfum, en hann hefur áratuga reynslu af fjármálamarkaði. Í fjárfestingateymi sjóðsins eru jafnframt þau Anna Kristjánsdóttir, Sigurður Ottó Þorvarðarson og Guðrún Una Valsdóttir.

„Þetta er ánægjuleg niðurstaða þar sem við teljum góð tækifæri vera á þeim mörkuðum sem sjóðurinn starfar. Fyrirtæki hafa þörf fyrir aukna valkosti í fjármögnun og er þetta liður í því að efla þann hluta starfsemi félagsins ásamt því að bjóða fjárfestum upp á áhugaverðan fjárfestingarkost“ segir Þorkell Magnússon.

„Íslensk verðbréf leggja mikla áherslu á sjóði um fjármögnun fyrirtækja og höfum við unnið markvisst að því að efla þá starfsemi á árinu. Stofnun SIV Credit Fund II er mikilvægur áfangi í þeirri þróun, en á árinu var jafnframt stofnaður SIV Alternative Credit Fund. Þetta markar jákvætt skref í áframhaldandi uppbyggingu Íslenskra verðbréfa, en eignir í stýringu félagsins nema nú 225 milljörðum króna,“ segir Arnór Gunnarsson, framkvæmdastjóri Íslenskra verðbréfa hf.

Nánari upplýsingar veitir Þorkell Magnússon, forstöðumaður sjóðastýringar hjá Íslenskum verðbréfum, í síma 854-1090. 

Íslensk verðbréf hf. hafa fengið staðfestingu Seðlabanka Íslands á nýjum reglum fyrir deildarskipta sjóðinn Fjárfestingarsjóður SIV eignastýringar hs. 

Breyting á nöfnum sjóða í rekstri Íslenskra verðbréfa

Þær fela í sér að ekki er lengur um deildarskiptan sjóð að ræða  heldur er hver deild orðin sjálfstæður sjóður. 

Samhliða þessu og sameiningu SIV eignastýringar hf. og ÍV sjóða hf. í eitt öflugt eignastýringarfélag undir merkjum Íslenskra verðbréfa fyrr á þessu ári var farið í nafnabreytingu á þremur sjóðum:

SIV Skammtímasjóður hs. ber nú heitið ÍV Skammtímasjóður plús hs.

SIV Skuldabréf hs. ber nú heitið ÍV Skuldabréf hs.

SIV Hlutabréf hs. ber nú heitið ÍV Hlutabréf hs.

Nýr sjóður í rekstri Íslenskra verðbréfa

Íslensk verðbréf hf. hefur lokið fjármögnun á nýjum sjóð sem ber heitið SIV Alternative Credit Fund. Um er að ræða sérhæfðan sjóð sem kemur að fjármögnun fyrirtækja en heildaráskriftarloforð sjóðsins nemur rúmum 5 milljörðum króna. Sjóðurinn hefur víðtækar heimildir við lánsfjármögnun fyrirtækja en fjárfestar í sjóðnum eru stofnanafjárfestar auk annarra fjárfesta. 

Íslensk verðbréf hf., dótturfélag Skaga hf., rekur verðbréfasjóði og sérhæfða sjóði fyrir almenna fjárfesta og fagfjárfesta ásamt því að hafa heimild til eignastýringar. Heildareignir í stýringu félagsins eru um 210 ma.kr.

Sjóðstjórar SIV Alternative Credit Fund eru Anna Kristjánsdóttir og Þorkell Magnússon, forstöðumaður sjóðastýringar. Auk þeirra eru í fjárfestingateymi sjóðsins Sigurður Ottó Þorvarðarson og Guðrún Una Valsdóttir.

„Það er ánægjulegt að ljúka fjármögnun sjóðsins og veita þannig fjárfestum aðgengi að lánamarkaði sem er áhugaverður. Um er að ræða ört vaxandi markað sem er til þess fallinn að veita fjárfestum aukna ávöxtun og áhættudreifingu í eignasöfnum sínum.“, segir Þorkell Magnússon, forstöðumaður sjóðastýringar Íslenskra verðbréfa hf.

,,Stofnun á SIV Alternative Credit Fund er mikilvægt skref í áframhaldandi uppbyggingu á Íslenskum verðbréfum. Þá er stofnun sjóðsins hluti af áherslum Íslenskra verðbréfa í að byggja upp öfluga starfsemi og þjónustu um fjármögnun fyrirtækja og er ánægjulegt að sjá það traust sem fjárfestar sýna félaginu,“ segir Arnór Gunnarsson, framkvæmdastjóri Íslenskra verðbréfa hf.

Samþykkt að sameina ÍV Skammtímasjóð og SIV Lausafjársjóð

Tilkynning um breytingar á reglum ÍV Skammtímasjóðs hs. og fyrirhugaðan samruna ÍV Skammtímasjóðs hs. og SIV Lausafjársjóðs hs.

Stjórn Íslenskra verðbréfa hf. samþykkti á fundi þann 30. maí 2025 breytingu á reglum og fjárfestingarstefnu fyrir ÍV Skammtímasjóð. Á sama fundi var samþykkt að sameina ÍV Skammtímasjóð og SIV Lausafjársjóð, sem er sjóðsdeild í Fjárfestingarsjóði SIV eignastýringar hs.

ÍV Skammtímasjóður er yfirtökusjóður og SIV Lausafjársjóður er samrunasjóður. Samruninn hefur hlotið samþykki Fjármálaeftirlits Seðlabanka Íslands og mun taka gildi þann 14. ágúst 2025.

Tilkynning til hlutdeildarskírteinishafa ÍV Skammtímasjóðs og SIV Lausafjársjóðs.pdf

Tilkynningar um fyrirhugaðar breytingar voru sendar sjóðfélögum sjóðanna 10. júlí 2025. Tilkynninguna má nálgast hér. 

Öflugt eigna- og sjóðastýringarfélag með 15 starfsmenn

Sameinað félag Íslenskra verðbréfa hf. hefur starfsemi

Samþykkt var á aðalfundi SIV eignastýringar og ÍV sjóða 31. mars síðastliðinn að sameina starfsemi félaganna undir merkjum Íslenskra verðbréfa hf. Með samrunanum verður til öflugt eigna- og sjóðastýringarfélag með um 200 milljarða króna í stýringu og reynslumikið teymi fimmtán starfsmanna. 

Framkvæmdastjóri Íslenskra verðbréfa er Arnór Gunnarsson, sem stýrði SIV eignastýringu. Forstöðumaður sjóðastýringar er Þorkell Magnússon og Jón Helgi Pétursson, sem stýrði ÍV sjóðum, er rekstrarstjóri félagsins. Sameinað félag byggir á öflugu teymi sjóðstjóra frá SIV og ÍV sjóðum sem hefur áratuga langa reynslu af fjárfestingum og er með starfsstöðvar bæði í Reykjavík og á Akureyri. Íslensk verðbréf hf. eru í dag eitt dótturfélaga Skaga hf. ásamt VÍS tryggingum hf. og Fossum fjárfestingarbanka hf.

„Uppbygging á eigna- og sjóðastýringarstarfsemi samstæðu Skaga er nú komið í það horf að hægt er að sækja fram af fullum krafti undir merkjum Íslenskra verðbréfa. Við byggjum starfsemina á traustum grunni, erum með þekkt vörumerki, öflugt teymi og nýjar stoðir til að tryggja betri þjónustu og þróa vöruframboð í takti við þarfir og væntingar viðskiptavina hverju sinni. Lykillinn að því er fjölbreyttur hópur sérfræðinga með mikla reynslu af eigna- og sjóðastýringu, öflug stoðþjónusta og fjölbreytt sjóðaframboð sem mun höfða vel til viðskiptavina.“ 

Öflugt félag á íslenskum fjármálamarkaði

Félagið býður upp á fjölbreytt sjóðaframboð almenna fjárfesta og fagfjárfesta. Samtals reka Íslensk verðbréf 18 verðbréfasjóði og sérhæfða sjóði fyrir almenna fjárfesta. Auk hefðbundinna opinna sjóða rekur félagið jafnframt lokaðar afurðir fyrir fagfjárfesta á borð við kreditsjóði en slíkir sjóðir taka við fjármagni frá fjárfestum og lána til fyrirtækja. Eignastýringarsvið félagsins stýrir sérgreindum eignasöfnum fyrir fagfjárfesta og stofnanafjárfesta en stærsta safn í stýringu félagsins er fjárfestingasafn VÍS trygginga. 

Anna Kristjánsdóttir hefur verið ráðin sem sjóðstjóri til SIV eignastýringar.

Anna Kristjánsdóttir til SIV eignastýringar 

Anna Kristjánsdóttir hefur verið ráðin sem sjóðstjóri til SIV eignastýringar og kemur hún inn í kredit teymi félagsins. SIV eignastýring mun fljótlega sameinast ÍV sjóðum undir nafninu Íslensk verðbréf en félagið tilheyrir samstæðu Skaga. 

Anna hefur umtalsverða reynslu á eignastýringarmarkaði og hefur starfað við stýringu skuldabréfa- og lánasjóða frá árinu 2002. Síðastliðin 7 ár starfaði hún sem forstöðumaður skráðra og sérhæfðra skuldabréfa hjá Stefni þar sem hún leiddi þróun á sérhæfðum afurðum lána- og veðlánasjóða. Fyrir þann tíma var hún sjóðstjóri innlendra skuldabréfasjóða hjá Stefni um árabil en hún hóf ferilinn í Búnaðarbanka Íslands. Anna sat auk þess í stjórn Eikar fasteignafélags á árunum 2010 til 2013. 

Anna hefur lokið meistaragráðu í fjármálum (M.fin) frá Háskóla Íslands auk þess að vera viðskiptafræðingur (B.sc) frá Háskólanum í Reykjavík. Hún hefur jafnframt lokið prófi í verðbréfaviðskiptum.

Arnór Gunnarsson, framkvæmdastjóri SIV eignastýringar: 

„Það er okkur sönn ánægja að fá Önnu til liðs við okkur. Hún býr yfir víðtækri reynslu sem mun styrkja félagið enn frekar á þeirri spennandi vegferð sem framundan er. Anna gengur til liðs við öflugt kredit teymi félagsins þar sem við sjáum mikil tækifæri á innlendum kredit mörkuðum næstu misserin. 

Framundan er sameining SIV eignastýringar og ÍV sjóða undir nafni Íslenskra verðbréfa, sem mun skapa öflugt eigna- og sjóðastýringarfélag með 200 milljarða króna í stýringu. Með fjölbreyttu úrvali sjóða og sérhæfðri eignastýringu mun félagið veita viðskiptavinum sínum enn betri þjónustu og fjölbreytta fjárfestingakosti.“

 ÍV verður öflugt eigna- og sjóðastýringarfélag með hátt í 200 milljarða króna í stýringu.

SIV eignastýring sameinast ÍV sjóðum og verður Íslensk verðbréf 

Með sameiningu SIV eignastýringar og ÍV sjóða undir heitinu Íslensk verðbréf verður til öflugt eigna- og sjóðastýringarfélag með hátt í 200 milljarða króna í stýringu og starfsemi í Reykjavík og á Akureyri. 

Arnór Gunnarsson verður framkvæmdastjóri Íslenskra verðbréfa og Jón Helgi Pétursson rekstrarstjóri. Sameinað félag mun byggja á öflugu teymi sjóðstjóra frá SIV og ÍV sjóðum með áratuga reynslu í fjárfestingum, en starfsemi félagsins skiptist í eigna- og sjóðastýringu. Fjárfestingasafn VÍS trygginga verður sem fyrr í stýringu hjá eignastýringarsviði félagsins sem Arnór mun veita forstöðu en auk þess eru sérgreind söfn fyrir fagfjárfesta og stofnanafjárfesta í stýringu félagsins. Þorkell Magnússon mun veita sjóðastýringu forstöðu en félagið mun bjóða upp á fjölbreytta valkosti opinna og lokaðra sjóða fyrir almenna fjárfesta jafnt og fagfjárfesta. Íslensk verðbréf stefnir á frekari vöxt á innlendum eignastýringarmarkaði með hagsmuni viðskiptavina og langtímaárangur þeirra að leiðarljósi..

SIV eignastýring og ÍV sjóðir verða sameinuð og munu bera nafnið Íslensk verðbréf. Íslensk verðbréf verður því öflugt eigna- og sjóðastýringarfélag með um 200 ma.kr. í stýringu. Félagið verður dótturfélag Skaga og mun Arnór Gunnarsson verða framkvæmdastjóri félagsins og Jón Helgi Pétursson rekstrarstjóri, auk þess sem Einar Már Hólmsteinsson verður áhættustjóri sameinaðs félags. Arnór verður staðsettur á skrifstofu félagsins í Reykjavík en Einar og Jón Helgi á Akureyri. 

Hversu margir starfsmenn vinna hjá félaginu? 

Í sameinuðu félagi verða áfram tvö svið, eignastýring og sjóðastýring. Arnór Gunnarsson verður forstöðumaður eignastýringar en þar munu einnig starfa Guðmundur Oddur Eiríksson, Hreggviður Ingason, Ottó Biering Ottósson og Sveinn Torfi Pálsson. Arnór, Guðmundur og Hreggviður verða starfandi á skrifstofum félagsins í Reykjavík en Ottó og Sveinn á skrifstofum félagsins á Akureyri. Fjárfestingarsafn VÍS trygginga verður sem fyrr í stýringu hjá eignastýringarsviði félagsins en auk þess eru sérgreind söfn fyrir fagfjárfesta og stofnanafjárfesta í stýringu félagsins.  

Þorkell Magnússon verður forstöðumaður sjóðastýringar hjá Íslenskum verðbréfum og mun sviðið telja samtals sjö starfsmenn; Guðrún Una Valsdóttir, Halldór Andersen, Jón Rúnar Ingimarsson, Sigurður Ottó Þorvarðarson, Sævar Ingi Haraldsson, Þorkell Magnússon og Þorsteinn Ágúst Jónsson. Þorsteinn verður starfandi á skrifstofunni á Akureyri en aðrir starfsmenn sjóðastýringar á skrifstofunni í Reykjavík. 

Hvað verður um þá sjóði sem SIV eignastýring og ÍV sjóðir eru að reka í dag?  

Vöruframboð sameinað félags verður einfaldað með sameiningu þeirra sjóða sem hafa sambærilega fjárfestingarstefnu. Ekki verður breyting á sjóðstjórum afurðanna en nánari útfærsla á sameiningum sjóða verður tilkynnt þegar að því kemur.  

Opnir sjóðir fyrir almenna fjárfesta verða reknir undir nafni ÍV. Fagfjárfestasjóðir SIV eignastýringar verða áfram reknir undir nafni SIV.  

Hvenær mun samruni félaganna eiga sér stað? 

Samruni félaganna miðast við 01.01.2025, að því gefnu að samþykki fjármálaeftirlits Seðlabanka Íslands og staðfesting fyrirtækjaskrár Skattsins liggi fyrir. Sameining félaganna, og þar með sameining sjóða, mun eiga sér stað þegar samþykki fjármálaeftirlits SÍ liggur fyrir en gert er ráð fyrir að það verði undir lok fyrsta ársfjórðungs 2025 eða í byrjun annars ársfjórðungs 2025.  

Eru Fossar fjárfestingarbanki hluti af sameinuðu félagi Íslenskra Verðbréfa? 

Nei, Fossar fjárfestingarbanki og Íslensk verðbréf eru hvort um sig dótturfélag Skaga – áður Vátryggingafélags Íslands. Íslensk verðbréf munu þó áfram sjá um stýringu sérgreindra safna og eignaleiða hjá Fossum fjárfestingarbanka, líkt og SIV eignastýring gerði áður.  

Hvernig mun stúktúr félagsins líta út eftir sameiningu félaganna? 

Strúktúr Skaga að sameiningu SIV eignastýringar og ÍV sjóða lokinni má sjá á myndinni hér að neðan.  

Nú er hægt að fjárfesta í sjóðum SIV eignastýringar í gegnum heimasíðu félagsins. 

Það gleður okkur að segja frá því að nú er hægt að fjárfesta í sjóðum SIV eignastýringar í gegnum heimasíðu félagsins. 

Til þess að fjárfesta rafrænt þarf að nýskrá sig sem viðskiptavin SIV eignastýringar og fara í gegnum einfalt kaupferli.

Viðskiptavinir SIV eignastýringar fá 100% afslátt af gengismun vegna viðskipta með sjóði félagsins.

Sérgreind eignastýring

Sérfræðingar

Fréttir