Óverðtryggð bréf sem og verðtryggð bréf hækkuðu um 0,5% í vikunni. Það er vaxandi eftirspurn eftir ríkistryggðum bréfum og búast má við að svo verði áfram næstu vikurnar.
Það eru nokkrir þættir sem ýta undir eftirspurnina. Í fyrsta lagi voru stýrivextir lækkaðir um 100 punkta þann 5. nóvember s.l. og eru nú 11%. Á sama tíma lækkaði SÍ innlánsvexti niður í 9%.
Í kjölfarið lækkuðu innlánsstofnanir sína vexti og því kom rót á innstæður í bönkum. Það má því búast við auknu flæði úr innistæðum í ríkistryggð bréf þegar líður nær áramótum þar sem ávöxtunarkrafa ríkisbréfa er nú hærri en almennt er hægt að fá í innlánum.
Í öðru lagi má búast við að lífeyrissjóðir minnki innlán og fari í ríkistryggð bréf fyrir áramót þar sem þau koma vel út í útreikningum sem lúta að tryggingafræðilegri stöðu þeirra. Getur skipt sköpum um hvort þeir þurfi að lækka réttindi eða ekki um næstu áramót.
Í þriðja lagi seldi SÍ mun minna af ríkisvíxlum en reiknað var með í síðasta útboði sem var 12. nóvember s.l. Á gjalddaga í nóvember voru 40 milljarðar en í útboðinu voru aðeins seldir 20 milljarðar. Það voru því 20 milljarðar sem út af stóðu og búast má við að þeir fjármunir leiti að einhverju marki í stutt ríkisbréf.
Innlenda hlutabréfavísitalan OMXI6ISK lækkaði í síðustu viku um 1,24% og var lokagildi hennar 806,43 stig. Heildarvelta félaga í vísitölunni var um 372 milljónir króna. Mest var velta með bréf Marels fyrir um 291 milljónir í 38 viðskiptum og Össur fyrir um 77 milljónir í 29 viðskiptum.
Í vikunni voru viðskipti með bréf í öllum þeim sex félögum sem mynda vísitöluna, þrjú hækkuðu og þrjú lækkuðu. Bakkavör hækkaði mest eða um 50% og Icelandair hækkaði um 24,14%.
Mesta lækkun var hjá Atlantic Petroleum(FO-ATLA) 7,52% í aðeins 2 viðskiptum. Næst mest lækkuðu bréf Össurar eða um 1,45%.
Í síðustu viku skiptu 12 milljónir hluta í Össuri um hendur í einum viðskiptum í kauphöllinni í Kaupmannahöfn. Þetta er um það bil 2,7% af útgefnu hlutafé félagsins. Seljandi var Össur Kristinsson stofnandi Össurar hf. Hann á eftir söluna í kringum 5% af hlutafé félagsins.
Þá gerði Össur hf. samning við Nýja Kaupþing og Saga Capital um viðskiptavakt á hlutabréfum félagsins á NASDAQ OMX á Íslandi.
Marel undirritaði viljayfirlýsingu við hollenska fjárfestingasjóðinn Nimbus varðandi sölu á Stork Food and Dairy Systems, einingu sem starfar utan við kjarnastarfsemi fyrirtækisins. Stefnt er að því að ljúka sölunni á þessu ári.
Færeyska flugfélagið Atlantic Airways skilaði hagnaði fyrstu 9 mánuði ársins upp á 7,8 milljónir danskra króna, í tilkynningu um uppgjörið kemur fram að líklegt er að hagnaður ársins þurrkist út á fjórða ársfjórðungi.
Miklar hækkanir einkenndu erlenda hlutabréfamarkaði í síðustu viku. Dow Jones vísitalan hækkaði um 2,46%, S&P 500 vísitalan hækkaði um 2,26% og Nasdaq hækkaði um 2,62%.
Í byrjun vikunnar birti fjárfestingarfélagið Berkshire Hathaway Inc ársfjórðungsuppgjör sitt og nam hagnaður félagsins 3,24 milljörðum. Á sama tíma í fyrra nam hagnaðurinn 1,06 milljörðum og hafði hann því þrefaldast á milli tímabila. Warren Buffett eigandi félagsins og einn frægasti fjárfestir heims sagði við það tilefni að hann teldi að lausafjárkrísan væri að minnka.
Í Evrópu hækkaði FTSE vísitalan í London um 2,99%, DAX í Þýskalandi hækkaði um 3,62% og CAC í Frakklandi hækkaði um 2,66% í vikunni. Samkvæmt tölum frá Hagstofu Evrópu mælist nú hagvöxtur á ný á evru-svæðinu í heild sinni.
Hang Seng vísitalan í Kína hækkaði um 3,32% í vikunni en Nikkei lækkaði um 0,19%. Að lokum hækkaði heimsvísitalan MSCI um 2,30%.
Krónan veiktist í vikunni og hækkaði gengisvísitalan um 0,23% skv. opinberu viðmiðunargengi SÍ og endaði í 239,43 stigum. Tvær vikur eru nú liðnar frá því breytingar á gjaldeyishöftum tóku gildi. Á þeim tíma hefur krónan veikst um 1%.
Reglum hefur verið breytt til að auka flæði í gegnum innlendan millibankamarkað með krónur. Ekki er heimilt að kaupa krónur á aflandsmarkaði og færa þær á innlenda bankareikninga eða til kaupa á innlendum verðbréfum sem eru í vörslu á Íslandi.
Þetta ætti að loka verulega fyrir að málamyndagerningar viðgangist þar sem krónur voru seldar innanlands og síðan keyptar aftur á aflandsmarkaði þar sem gengi krónunnar er mun lægra. Gjaldeyrir var keyptur út á málamyndasamninga um kaup á vörum eða fasteignum.
Nýjar reglur ættu að hafa þau áhrif að útflytjendur verða að selja sinn gjaldeyri hér á landi til að greiða fyrir innlendan kostnað. Helsti ókosturinn við nýtt fyrirkomulag er að hert er á höftunum en slíkt mun líklega auka mun á milli gengi krónunnar hér á landi og erlendis. Krónan hefur veikst undanfarið á erlendum mörkuðum og munur milli kaup- og sölugengis er orðinn mjög mikill.Markaðsfréttir Íslenskra verðbréfa eru unnar af starfsmönnum
Íslenskra verðbréfa hf. Þær eru stutt samantekt og ber ekki að líta svo
á að í þeim sé að finna allar tiltækar upplýsingar um þau viðfangsefni
sem til umfjöllunar eru.
Við vinnslu fréttanna er stuðst við innlendar og erlendar
upplýsinga- og fréttaveitur sem taldar eru áreiðanlegar, en einnig við
opinberar upplýsingar, eigin úrvinnslu og mat starfsmanna á hverjum
tíma. Íslensk verðbréf hf. ábyrgjast þó ekki nákvæmni upplýsinganna,
áreiðanleika eða réttmæti þeirra.
Markaðsfréttirnar eru einungis birtar í upplýsingaskyni og skal því ekki litið á þær sem ráðleggingu/ráðgjöf um að ráðast eða ráðast ekki í tiltekna fjárfestingu eða tilboð um að kaupa, selja eða skrá sig fyrir tilteknum fjármálagerningum.