Markaðsfréttir - síðasta vika
Innlend skuldabréf
Óverðtryggð bréf hækkuðu um 0,89% í vikunni og verðtryggð bréf hækkuðu um 0,95%. Ríkistryggð bréf tóku góðan kipp eftir að Seðlabankinn lækkaði stýrivexti niður í 10% eða um 100 punkta. Þetta var meiri lækkun en flestir reiknuðu með.
Það var áfram góð hækkun á verðtryggðum skuldabréfum þrátt fyrir að þau séu orðin dýr. Ástæðan er mikið laust fé en fáir fjárfestingakostir. Lausa féð fer frekar í verðtryggð en óverðtryggð bréf og endurspeglar það vantrú fjármagnseigenda á að stjórnvöldum takist að hafa hemil á verðbólgunni.
Telja má líklegt að fjárfestir haldi áfram að fjárfesta í ríkistryggðum bréfum þangað til aðrir kostir verða raunhæfir s.s. innlend hlutabréf og erlend verðbréf.
Innlend hlutabréf
Talsvert minni velta var þessa vikuna með bréf félaga í OMXI6ISK en í síðustu viku. Veltan var um 384 milljónir. Þar af voru viðskipti með bréf í Marel, fyrir um 335 milljónir. Vístalan hækkaði um 0,54%.
Century Aluminum sem ekki er í OMXI6ISK vísitölunni hækkaði um 15,07% í vikunni og var velta með bréf félagsins í kringum 19,5 milljónir og stóð gengið í 1.527 í vikulok.
Nasdaq OMX Nordic tilkynnti á föstudag niðurstöður endurskoðunar á OMX Iceland 6 vísitölunni(OMXI6ISK), sem gerð er tvisvar á ári. Endurskoðuð samsetning tekur gildi 4.janúar 2010.
Ein breyting verður á vísitölunni, færeyska félagið Atlantic Airways kemur inn en út fer Icelandair Group. Það verða því 3 færeysk félög á móti 3 íslenskum í vísitölunni.
Þann 4.janúar 2010 verða því þessi 6 félög í OMXI6 vísitölunni: Atlantic Petroleum P/F, Bakkavör Group hf., Færeyja Banki P/F, Marel Food Systems hf., P/F Atlantic Airways og Össur hf.
| Félög/vísitala | Lokagildi | Vika | 1 mán | 3 mán | 6 mán | Frá áram. | 12 mán |
| Bakkavör | 1,55 | -8,82% | 3,33% | -3,13% | 51,96% | -38,49% | -52,16% |
| FO-Atla | 166 | 0,00% | 0,00% | -31,25% | -49,68% | -51,61% | -59,42% |
| FO-Bank | 132 | 0,00% | -2,58% | -4,69% | 7,32% | 9,09% | 9,09% |
| Icelandair Group | 3,65 | -3,95% | 1,39% | -6,41% | -18,89% | -72,45% | -72,14% |
| Marel | 63,5 | 1,60% | -7,84% | 8,55% | 19,81% | -18,38% | -16,12% |
| Össur | 139 | 1,83% | 2,58% | 13,01% | 25,23% | 39,28% | 43,89% |
| OMXI6ISK | 795,07 | 0,54% | -1,41% | -1,42% | 8,11% | -20,46% | -20,46% |
Erlend hlutabréf
Dow Jones vísitalan hélt áfram að hækka í síðustu viku en ýmsar jákvæðar hagtölur voru birtar í vikunni. Má þar nefna að smásala í nóvember jókst um 1,3% í Bandaríkjunum miðað við sama mánuð í fyrra sem var töluvert meiri hækkun en spár sögðu til um.
Þá jókst útflutningur í október verulega og halli á vöruskiptum minnkaði um 7,6% frá september.
Frá Evrópu bárust einnig jákvæðar fréttir af vöruskiptum í Þýskalandi og jókst útflutningur þar um 2,5% í október frá fyrri mánuði en aukin eftirspurn hefur verið á stáli og öðrum iðnaðarvörum.
Ágætis hækkun varð á Nikkei vísitölunni í Japan og virðist sem fréttir í vikunni um háar fjárhæðir sem stjórnvöld í Japan hyggjast dæla inn í japanskt efnahagslíf á næstunni hafi borið árangur.
Stöðnun hefur einkennt efnahagslíf þessa stóra hagkerfis í mörg ár og verður því fróðlegt að fylgjast með hvaða áhrif innspýtingin mun hafa á hagkerfið á komandi ári.
| Vísitölur | Lokagildi | Vika | 1 mán | 3 mán | 6 mán | Frá áram. | 12 mán |
| DAX | 5756,29 | -1,06% | 2,34% | 3,54% | 14,81% | 20,98% | 24,76% |
| FTSE | 5261,57 | -1,14% | 0,36% | 5,90% | 19,65% | 19,86% | 24,14% |
| CAC | 3803,72 | -1,12% | 0,76% | 2,79% | 15,28% | 19,17% | 19,30% |
| Dow Jones | 10405,83 | 0,89% | 1,96% | 8,77% | 19,00% | 19,31% | 21,34% |
| Nasdaq | 1799,37 | 0,02% | 0,19% | 5,80% | 20,27% | 47,90% | 48,52% |
| S&P 500 | 1102,35 | 0,09% | 1,18% | 5,44% | 16,93% | 22,49% | 25,77% |
| Nikkei | 10107,87 | 0,85% | 3,43% | -0,94% | -0,30% | 14,07% | 22,70% |
| OMXS30 | 949,84 | -1,77% | -0,81% | 4,95% | 20,00% | 44,89% | 45,38% |
| OBX | 330,82 | -0,18% | 6,10% | 18,92% | 20,61% | 67,57% | 82,88% |
| OMXH25 | 1960,37 | -0,08% | 0,26% | 1,64% | 16,69% | 29,97% | 32,12% |
| OMXC20 | 332,00 | -1,66% | 0,58% | 0,58% | 9,83% | 34,68% | 31,82% |
Krónan
Krónan veiktist í vikunni og hækkaði gengisvísitalan um 0,21% skv. opinberu viðmiðunargengi SÍ og endaði í 235,51 stigum.
Velta er enn lítil og strjál. Búast má við töluverðu útflæði á næstu vikum sökum gjalddaga á ríkistryggðum bréfum, en það var vaxtagjalddagi í síðust viku í flokki RIKB 10 1210 og þann 15. des. n.k. verður gjalddagi í flokki HFF 150644.
Erlendir fjárfestar eiga töluvert af ríkistryggðum skuldabréfum og er þeim heimilt að skipta vaxtagreiðslum í erlenda mynt. Sama gildir með vaxtagreiðslur af bankainnistæðum og má búast við að á stærstum hluta bankabóka séu vextir greiddir einu sinni á ári.
Innflutningur fyrir jól er venjulega töluvert mikill. Líklegt er því að krónan gefi eftir á næstu vikum. Áhugavert verður að sjá hvort seðlabankinn haldi á móti með inngripum.
| Vísitala | Lokagildi | Vika | 1 mán | 3 mán | 6 mán | Frá áram. | 12 mán |
| GVT ISK | 235,51 | 0,21% | 0,17% | -1,10% | -3,05% | -8,70% | -14,45% |
Fyrirvari
Markaðsfréttir Íslenskra verðbréfa eru unnar af starfsmönnum Íslenskra verðbréfa hf. Þær eru stutt samantekt og ber ekki að líta svo á að í þeim sé að finna allar tiltækar upplýsingar um þau viðfangsefni sem til umfjöllunar eru.
Við vinnslu fréttanna er stuðst við innlendar og erlendar upplýsinga- og fréttaveitur sem taldar eru áreiðanlegar, en einnig við opinberar upplýsingar, eigin úrvinnslu og mat starfsmanna á hverjum tíma. Íslensk verðbréf hf. ábyrgjast þó ekki nákvæmni upplýsinganna, áreiðanleika eða réttmæti þeirra.
Markaðsfréttirnar eru einungis birtar í upplýsingaskyni og skal því ekki litið á þær sem ráðleggingu/ráðgjöf um að ráðast eða ráðast ekki í tiltekna fjárfestingu eða tilboð um að kaupa, selja eða skrá sig fyrir tilteknum fjármálagerningum.