Vikulega birta Íslensk verðbréf samantekt um þróun helstu eignaflokka undanfarna viku. Smelltu hér ef þú vilt skrá þig á listann.
Löng verðtryggð skuldabréf lækkuðu um 0,64% og millilöng verðtryggð skuldabréf lækkuðu um 0,39%. Löng óverðtryggð skuldabréf hækkuðu um 0,20% en millilöng óverðtryggð skuldabréf lækkuðu um 1,10%.
Föstudaginn 3. febrúar fór fram útboð á RB 16. Tilboð bárust fyrir 3.450 m.kr. að nafnverði en tilboðum fyrir 1.800 m.kr. var tekið á ávöxtunarkröfunni 4,96%. Þetta verður að teljast fremur dræm þátttaka og sýnir að áhugi fjárfesta á óverðtryggðum bréfum er takmarkaður þessa dagana.
Miðvikudaginn 8. febrúar mun Peningastefnunefnd Seðlabanka Íslands kynna vaxtaákvörðun sína. Ljóst er að líkur á vaxtahækkun hafa aukist töluvert og eru flestir greiningaraðilar á því að vextir verði hækkaðir um 0,25 prósentustig. Á fundi nefndarinnar má reikna með að tónninn verði gefinn fyrir enn frekari vaxtahækkanir.
OMXI6ISK vísitalan hækkaði um rúmt 1% í síðustu viku. Mest hækkun var hjá Færeyska olíuleitarfélaginu Atlantic Petroleum, um rúm 10% í viðskiptum fyrir um 1,1 m.kr. en félagið birti í vikunni framleiðslutölur sem voru nokkuð góðar. Mest lækkuðu bréf BankNordik, um 6,58%.
Heildarvelta á OMXI6ISK var í kringum 1 ma. kr., mest velta var með bréf Marel, fyrir um 850 m.kr. Veltan í janúar með bréf á OMXI6ISK nam um 2,8 mö. kr.
Marel skilaði góðri afkomu fyrir árið 2011. Hagnaður nam 34,5 milljónum evra sem er um 153% hækkun á milli ára. Hagnaður á síðasta fjórðungi ársins var í kringum 15 milljónir evra sem er um 173% hækkun frá sama fjórðungi 2010. Tekjur af kjarnastarfsemi námu 668 milljónum evra sem er 15% aukning á milli ára.
Pantanabók félagsins er sterk og stendur í rúmum 196 milljónum evra í lok árs 2011, nýjar pantanir voru þó örlítið lægri fyrir 4. fjórðung 2011 en 4. fjórðung 2010. Stjórn Marel mun leggja til að hluthafar fái greiddan arð upp á 0,95 evrur sem jafngildir um 20% af hagnaði ársins.
Icelandair tilkynnti að stjórn félagsins hefði ákveðið að skoða mögulega viðbótarskráningu í kauphöllina í Osló. Einnig tilkynnti stjórnin að frá og með 1.ársfjórðungi 2012 mun félagið breyta uppgjörsmynt í USD en meirihluti kostnaðar og efnahagsreiknings félagsins er í Bandaríkjadollar.
Í vikunni munu Icelandair og Össur birtar ársuppgjör.
Félög/vísitala | Lokagildi | Vika | 1 mán | 3 mán | 6 mán | Frá áram. | 12 mán |
BNORDIK | 71,00 | -6,58% | -12,35% | 0,00% | -34,26% | -12,35% | -47,41% |
FO-ATLA | 178,50 | 10,19% | 7,85% | 37,31% | 3,78% | 16,67% | -16,59% |
HAGA | 16,75 | -0,59% | 0,30% | 0,00% | 0,00% | 2,45% | 5,02% |
ICEAIR | 5,30 | 3,92% | 6,64% | -2,21% | 4,74% | 5,37% | 26,49% |
MARL | 140,50 | 0,72% | 10,20% | 14,69% | 15,64% | 11,95% | 19,57% |
OSSRu | 193,00 | 1,58% | 0,00% | 0,00% | -3,50% | 4,32% | -3,50% |
OMXI6ISK | 971,55 | 1,01% | 4,15% | 7,91% | 1,17% | 6,80% | -1,51% |
(Verðbreyting í viðkomandi mynt, Nasdaq OMX Nordic, 06. febrúar 2012)
Almennt var mikil hækkun á erlendum hlutabréfum í vikunni. Heimsvísitalan MSCI hækkaði um 2,22% og hefur nú hækkað um 7,71% frá áramótum. DAX í Þýskalandi hækkaði um 3,91% og Nasdaq í Bandaríkjunum um 3,16%. Nikkei í Japan lækkaði um 0,11%.
Í Bandaríkjunum ríkir mikil bjartsýni eftir að atvinnuleysi reyndist minna en spár höfðu gert ráð fyrir. Í janúar fjölgaði störfum þar um 243 þúsund og hefur ekki fjölgað svo mikið í einum mánuði frá því í apríl s.l. og er atvinnuleysi nú 8,3% sem er það lægsta síðan í febrúar 2009.
Á leiðtogafundi ESB komust leiðtogar ríkjanna að samkomulagi sem felur í sér hert eftirlit með fjárlögum aðildarríkja sambandsins. Tékkar og Bretar eru þó ekki aðilar að samkomulaginu, en það á að hindra óeðlilega mikla skuldsetningu einstakra ríkja.
Mikil áhersla verður einnig lögð á að leysa skuldavandræði Grikklands á fundi leiðtoganna. Þann 20. mars n.k. er gríska ríkið með 14,5ma. evra lán á gjalddaga og þurfa grísk stjórnvöld að grípa til viðamikilla niðurskurðaraðgerða auk þess að auka skatttekjur ætli þau að fá aðstoð frá Alþjóða gjaldeyrissjóðnum og hinum evruríkjunum.
Vísitölur | Lokagildi | Vika | 1 mán | 3 mán | 6 mán | Frá áram. | 12 mán |
Heimsvísitala (MSCI) | 1273,74 | 2,22% | 6,89% | 5,87% | 6,67% | 7,71% | -4,35% |
Þýskaland (DAX) | 6766,67 | 3,91% | 11,15% | 12,86% | 7,97% | 14,16% | -6,69% |
Bretland (FTSE) | 5901,07 | 2,92% | 4,06% | 6,36% | 12,04% | 5,50% | -1,98% |
Frakkland (CAC) | 3427,92 | 3,29% | 8,23% | 8,71% | 3,57% | 7,46% | -16,10% |
Bandaríkin (Dow Jones) | 12862,23 | 1,59% | 4,06% | 7,34% | 12,39% | 5,28% | 6,37% |
Bandaríkin (Nasdaq) | 2905,66 | 3,16% | 8,65% | 8,17% | 14,74% | 11,54% | 4,92% |
Bandaríkin (S&P 500) | 1344,90 | 2,17% | 5,25% | 7,31% | 12,13% | 6,94% | 2,60% |
Japan (Nikkei) | 8831,93 | -0,11% | 6,42% | 1,45% | -3,99% | 5,60% | -15,31% |
Samnorræn (VINX) | 96,73 | 4,48% | 6,98% | 11,53% | 16,52% | 9,95% | -9,80% |
Svíþjóð (OMXS30) | 1078,66 | 3,58% | 6,70% | 8,32% | 12,82% | 8,24% | -6,15% |
Noregur (OBX) | 377,58 | 2,59% | 2,98% | 5,40% | 11,58% | 4,79% | -7,09% |
Finnland (OMXH25) | 2193,02 | 3,58% | 9,61% | 9,23% | 16,63% | 12,25% | -18,29% |
Danmörk (OMXC20) | 432,89 | 6,90% | 7,93% | 18,61% | 14,67% | 10,27% | -6,61% |
(Verðbreyting í viðkomandi mynt, Bloomberg, 06. febrúar 2012)
Gengisvísitala krónunnar hækkaði um 0,14% í vikunni og endaði í 222,07 stigum. Krónan var nánast óbreytt gagnvart evru í vikunni, styrktist um 0,26% gagnvart Bandaríkjadal en veiktist um 0,55% gagnvart sterlingspundi og 0,62% gagnvart sænskri krónu. Frá áramótum hefur gengisvísitala krónunnar hækkað um 2,20%.
Gengisþróun er óhjákvæmilega samofin verðbólguvæntingum og má telja að veiking krónunnar undanfarið eigi sinn þátt í að verðbólga hafi verið umfram væntingar. Á móti kemur að mikill afgangur er af vöruskiptum og gæti það unnið með krónunni. Samkvæmt bráðabirgðatölum Hagstofu Íslands voru vöruskiptin í janúar hagstæð um 12 ma. kr. sem er 49% aukning frá fyrra ári. Stefnir í miklar tekjur á þessu ári bæði af útflutningi sjávarafurða og af ferðamannaiðnaði.
Vísitala | Lokagildi | Vika | 1 mán | 3 mán | 6 mán | Frá áram. | 12 mán |
GVT ISK | 222,07 | 0,14% | 2,12% | 4,16% | 0,33% | 2,20% | 3,93% |
(Gengisvísitala krónunnar, Seðlabankinn, 06. febrúar 2012)
Markaðsfréttir Íslenskra verðbréfa eru unnar af starfsmönnum Íslenskra verðbréfa hf. Þær eru stutt samantekt og ber ekki að líta svo á að í þeim sé að finna allar tiltækar upplýsingar um þau viðfangsefni sem til umfjöllunar eru.
Við vinnslu fréttanna er stuðst við innlendar og erlendar upplýsinga- og fréttaveitur sem taldar eru áreiðanlegar, en einnig við opinberar upplýsingar, eigin úrvinnslu og mat starfsmanna á hverjum tíma. Íslensk verðbréf hf. ábyrgjast þó ekki nákvæmni upplýsinganna, áreiðanleika eða réttmæti þeirra.
Markaðsfréttirnar eru einungis birtar í upplýsingaskyni og skal því ekki litið á þær sem ráðleggingu/ráðgjöf um að ráðast eða ráðast ekki í tiltekna fjárfestingu eða tilboð um að kaupa, selja eða skrá sig fyrir tilteknum fjármálagerningum.
Ábyrgðarmaður Vikulegra markaðsfrétta Íslenskra verðbréfa er Björn Snær Guðbrandsson, forstöðumaður eignastýringar.