Verðtryggð skuldabréf hækkuðu um 0,14% í vikunni og óverðtryggð um 0,6%. Mest hækkuðu löng óverðtryggð bréf og hækkaði RIKB 25 um 0,93% og RIKB 19 um 0,6%. Nú er svo komið að krafa allra óverðtryggðra bréfa er komin undir 6% og vel undir 5% á styttri bréfum.
Meðalverðbólga á Íslandi á ársgrunni hefur verið 6,1% undanfarin 10 ár og 8,3% undanfarin 5 ár en það segir þó ekkert til um þá verðbólgu sem mun verða næstu árin. Hins vegar mun sú litla verðbólga sem mælst hefur undanfarna mánuði líklega aukast þegar hagkerfið kemst almennilega af stað.
Þrýstingur á launahækkanir mun fara vaxandi og aukin eftirspurn ein og sér mun leiða til þess að verslun og þjónusta leitast við að auka álagningu sína. Undanfarna þrjá mánuði hefur húsnæðisliður vísitölu neysluverðs haft áhrif til hækkunar vísitölunnar og líklega mun það verða þannig áfram.
Fróðlegt verður að sjá hvort Ísland komist upp úr hjólum
mikillar verðbólgu en ýmsir telja að viðtæk verðtrygging sé einn af stærri
áhrifavöldum hennar.
OMXI6ISK vísitalan stóð nánast í stað á milli vikna. Össur hækkaði mest, um rúmt 1%. Mest lækkuði Eik banki og nam lækkunin 4,76% í litlum viðskiptum.
Veltan í síðustu viku var um 136 m.kr. og sem fyrr var mest velta með bréf í Össuri og Marel, ríflega 67 milljónir með hvort félag. Í vikunni keypti forstjóri Össurar hf. Jón Sigurðsson 35.000 hluti í félaginu á genginu 199.
Í síðustu viku birtu tvö félög í vísitölunni hálfs árs uppgjör.
Eik banki í
Færeyjum skilaði hagnaði upp á 3 milljónir danskra króna eftir skatta á fyrstu
6 mánuðum ársins, á sama tíma í fyrra var tap upp á 69 milljónir danskra
króna. Vaxtatekjur bankans jukust um 25%
á milli ára, einnig var aukning á þóknunartekjum á milli ára sem nam 10%.
Launatengd gjöld og kostnaður hækkuðu um 13%. Forstjóri bankans segir að þrátt fyrir að árið 2010 verði bankanum erfitt þá er enn spáð hagnaði af rekstri fyrir árið í heild.
Icelandair Group
tapaði 2 ma.kr. á fyrstu 6 mánuðum ársins en um 5 ma.kr. árið 2009. Heildartekjur félagsins jukust um 12% á milli
ára. Gosið í Eyjafjallajökli hafði
veruleg áhrif á rekstur félagsins og er tjónið metið á um 1,5 ma.kr.
Þrátt fyrir þetta hefur félagið hækkað EBITDA-spá ársins úr 7,6 ma.kr í 8,5 ma.kr fyrir árið í heild. EBITDA fór úr 1,5 ma.kr. fyrstu 6 mánuði 2009 í 2,3 ma.kr. í ár.
Þá tilkynnti Icelandair Group í síðustu viku að fjárhagslegri endurskipulagningu væri lokið. Fjárfestar hafa skráð sig fyrir 5,5 ma.kr að markaðsvirði í nýju hlutafé sem jafngildir 2,2 milljörðum nýrra hluta.
FME veitti
Framtakssjóði Íslands undanþágu frá yfirtökuskyldu á félaginu sem myndast við
eign yfir 30%. Framtakssjóðurinn
skuldbatt sig til að leggja fram 3 ma.kr. og eignast þar með 1,2 milljarða
hluta í félaginu á genginu 2,5 og með því 32,5% hlutafjár í félaginu.
Þá skuldbatt Lífeyrissjóður Verslunarmanna sig til að fjárfesta fyrir 1 ma.kr. einnig á genginu 2,5. Stærstu lánveitendur munu breyta skuldum fyrir 3,6 ma.kr. í hlutafé á genginu 5.
Stefnt er að safna 2,5 ma.kr. í viðbót í nýju
hlutafé en tilkynnt verður síðar um fyrirkomulag og tímasetningu þess útboðs.
Félög/vísitala | Lokagildi | Vika | 1 mán | 3 mán | 6 mán | Frá áram. | 12 mán |
BNORDIK | 144,00 | 0,00% | 0,00% | -8,28% | -1,37% | 11,20% | 18,52% |
FO-ATLA | 142,00 | 0,00% | 5,19% | -12,07% | -10,69% | -11,25% | -48,75% |
FO-EIK | 80,00 | -4,76% | 1,27% | -4,76% | -0,25% | 0,00% | -6,98% |
ICEAIR | 3,40 | 0,00% | -2,86% | 9,68% | 17,24% | -6,85% | -24,44% |
MARL | 91,50 | 0,88% | 1,55% | 8,67% | 49,51% | 46,63% | 67,28% |
OSSR | 198,50 | 1,02% | 7,30% | 8,77% | 21,78% | 28,48% | 69,66% |
OMXI6ISK | 935,04 | -0,02% | 3,19% | 0,75% | 11,62% | 14,73% | 23,07% |
(Nasdaq OMX Nordic, 16. ágúst 2010)
Erlend hlutabréf lækkuðu mikið í liðinni viku. Heimsvísitalan lækkaði um 4,17%, Dax vísitalan í Þýskalandi lækkaði um 2,38%, Dow Jones lækkaði um 3,21% og Nikkei lækkaði um 4,03%.
Hagvöxtur í Þýskalandi mældist 2,2% á öðrum ársfjórðungi ársins en svo mikill
hagvöxtur hefur ekki mælst þar í landi undanfarin 20 ár. Ástæða hagvaxtarins er
rakin til aukins útflutnings en útflutningur af evrusvæðinu nýtur nú veikari
evru.
Meðalhagvöxtur á evrusvæðinu var 1% á öðrum fjórðungi og heldur Þýskaland áfram að draga vagninn á evrusvæðinu, en tveir þriðju hagvaxtar svæðisins á tímabilinu má rekja til Þýskalands.
Seðlabankastjóri Bandaríkjanna, Ben Bernanke, segir að seðlabankinn muni
auka peningamagn í umferð og fjárfestingar til langs tíma til þess að efla
efnahag landsins.
Þessar yfirlýsingar höfðu ekki jákvæð áhrif á markaðinn til skemmri tíma. Aftur á móti telja menn að efnahagshorfur til lengri tíma séu bjartar. Fjármálakerfi landsins hefur náð þó nokkrum stöðugleika og stærstu bankar landsins eru farnir að skila hagnaði í takt við væntingar.
Vísitölur | Lokagildi | Vika | 1 mán | 3 mán | 6 mán | Frá áram. | 12 mán |
Heimsvísitala (MSCI) | 1106,07 | -4,17% | 1,25% | -1,80% | -1,89% | -5,56% | 3,72% |
Þýskaland (DAX) | 6110,41 | -2,38% | 0,99% | 0,71% | 9,08% | 2,39% | 14,89% |
Bretland (FTSE) | 5275,44 | -0,94% | 1,98% | -0,04% | 0,32% | -2,81% | 11,60% |
Frakkland (CAC) | 3610,91 | -2,83% | 2,65% | 0,91% | -2,08% | -8,73% | 2,79% |
Bandaríkin (Dow Jones) | 10303,15 | -3,21% | 2,03% | -2,98% | 0,33% | -1,20% | 10,53% |
Bandaríkin (Nasdaq) | 1818,80 | -4,41% | 0,85% | -4,63% | 0,93% | -2,23% | 12,86% |
Bandaríkin (S&P 500) | 1079,25 | -3,71% | 1,35% | -4,97% | -1,43% | -3,21% | 7,49% |
Japan (Nikkei) | 9253,46 | -4,03% | -2,25% | -12,10% | -8,35% | -12,80% | -13,22% |
Samnorræn (VINX) | 89,61 | -3,14% | 1,45% | 1,62% | 9,70% | 11,65% | 23,34% |
Svíþjóð (OMXS30) | 1036,45 | -2,70% | 0,03% | 5,09% | 10,78% | 8,75% | 18,05% |
Noregur (OBX) | 326,34 | -4,89% | 2,90% | -0,99% | 3,31% | -3,81% | 20,59% |
Finnland (OMXH25) | 2258,72 | -1,60% | 4,85% | 5,37% | 11,14% | 10,18% | 22,48% |
Danmörk (OMXC20) | 412,99 | -1,55% | 0,14% | 1,49% | 15,61% | 21,74% | 24,35% |
(Verðbreyting í viðkomandi mynt, Bloomberg, 16. ágúst 2010)
Gengi krónunnar styrktist í liðinni viku og lækkaði gengisvísitalan
um 0,77% og endaði í 207,74. Krónan styrkist enn gagnvart evru og lækkaði
evra um 1,26% í verði í vikunni. Síðastliðna 3 mánuði nemur lækkunin 6,44% og
14,83% frá áramótum.
Yfir sumarmánuðina nýtur krónan innflæðis vegna erlendra ferðamanna en einnig hafa viðskiptakjör útflutningsvara batnað undanfarin misseri.
Seðlabankinn gaf þann 23. júní út að hann stefndi að kaupum á gjaldeyri. Það ætti að halda aftur af frekari styrkingu eða jafnvel veikja krónuna. Þrátt fyrir þessa yfirlýsingu hefur evran lækkað í verði um 2,25% frá 23. júní. Evran hefur verið að styrkjast nokkuð frá þessum tíma og fást nú 3,6% fleiri dollarar fyrir hverja evru.
Flest bendir til þess að evrusvæðið sé komið fyrir vindinn og mun krónan njóta góðs af því a.m.k meðan gjaldeyrishöftin eru við lýði. Þar má nefna ágætt afurðaverð útflutningsvara, sem fer jafnvel hækkandi og auknar tekjur af ferðamönnum vegna vaxandi kaupmáttar í Evrópu.
Einnig ætti krónan að fylgja evrunni nokkuð og styrkjast
frekar en hitt í skjóli haftanna en viðskipti eru þó fremur strjál á
millibankamarkaði með krónur.
Síðan verður að koma í ljós hvað Seðlabanki Íslands telur ásættanlegt að krónan styrkist mikið. Bankinn gæti þá selt krónur og byggt upp gjaldeyrisforðann og þannig viðhaldið sterkri samkeppnisstöðu landsins með veiku raungengi.
Vísitala | Lokagildi | Vika | 1 mán | 3 mán | 6 mán | Frá áram. | 12 mán |
GVT ISK | 207,74 | -0,77% | -1,93% | -4,48% | -9,53% | -10,77% | -11,17% |
(Gengisvísitala krónunnar, Bloomberg, 16. ágúst 2010)
Markaðsfréttir Íslenskra verðbréfa eru unnar af starfsmönnum Íslenskra verðbréfa hf. Þær eru stutt samantekt og ber ekki að líta svo á að í þeim sé að finna allar tiltækar upplýsingar um þau viðfangsefni sem til umfjöllunar eru.
Við vinnslu fréttanna er stuðst við innlendar og erlendar upplýsinga- og fréttaveitur sem taldar eru áreiðanlegar, en einnig við opinberar upplýsingar, eigin úrvinnslu og mat starfsmanna á hverjum tíma. Íslensk verðbréf hf. ábyrgjast þó ekki nákvæmni upplýsinganna, áreiðanleika eða réttmæti þeirra.
Markaðsfréttirnar eru einungis birtar í upplýsingaskyni og skal því ekki litið á þær sem ráðleggingu/ráðgjöf um að ráðast eða ráðast ekki í tiltekna fjárfestingu eða tilboð um að kaupa, selja eða skrá sig fyrir tilteknum fjármálagerningum.
Ábyrgðarmaður Vikulegra markaðsfrétta Íslenskra verðbréfa er Björn Snær Guðbrandsson, forstöðumaður eignastýringar.