Löng verðtryggð skuldabréf hækkuðu um 0,14% í vikunni og stutt verðtryggð bréf hækkuðu um 0,13%. Löng óverðtryggð bréf hækkuðu um 0,44%.
Óverðtryggð bréf halda því áfram að hækka meira en verðtryggð bréf og ljóst að fjárfestar reikna með stöðugri krónu og lágri verðbólgu á næstu misserum.
S.l. miðvikudag var ríkisvíxlaútboð. Tilboðum var tekið fyrir rúma 12 milljarða og voru meðalvextir 6,25% (flatir vextir). Á sama tíma voru viðskipti með RIKB 10 1210 á undir 5% kröfu. Þetta er ríkisbréfaflokkur sem er á gjalddaga í desember en ríkisvíxlaflokkurinn er með gjalddaga í september og því er ekki óeðlilegt að bera þessa fjárfestingakosti saman. Þarna virðist vera ansi mikil skekkja sem erfitt er að skýra út.
Heldur lítil velta var með bréf á OMXI6ISK í vikunni enda aðeins 4 viðskiptadagar. Veltan nam ríflega 80 milljónum króna sem er umtalsvert minna en síðustu vikur. Það voru eingöngu viðskipti með bréf í Marel, Össuri og BankNordik.
Vísitalan lækkaði um 1,62% í síðustu viku og hefur þá lækkað um 7,6% síðan hún náði sínu hæsta gildi á árinu þann 30. apríl.
Mest velta var með bréf Marels fyrir 42 milljónir, en félagið lækkaði mest allra í vísitölunni um 2,55%. Þetta var önnur vikan í röð sem Marel og Össur lækka. Þrjú félög lækkuðu en þrjú stóðu í stað.
Atlantic Airways skilaði tapi eftir skatta upp á 5,7 milljónir danskra króna á fyrsta ársfjórðungi en á sama tíma á síðasta ári var hagnaður upp á 11,5 milljónir. Eins og svo mörg önnur flugfélög þá hefur félagið ekki farið varhluta af öskufalli úr Eyjafjallajökli og mun það hafa áhrif í uppgjöri á næsta fjórðung.
Félög/vísitala | Lokagildi | Vika | 1 mán | 3 mán | 6 mán | Frá áram. | 12 mán |
BNORDIK | 157 | -1,88% | -1,88% | 7,53% | 15,87% | 21,24% | 29,75% |
FO-AIR | 127 | 0,00% | -1,55% | -9,93% | -9,29% | -9,93% | -23,95% |
FO-ATLA | 161,5 | 0,00% | -2,12% | 1,57% | -2,71% | 0,94% | -2,47% |
ICEAIR | 3,1 | 0,00% | -8,82% | 6,90% | -22,50% | -15,07% | -31,11% |
MARL | 84,2 | -2,55% | 0,48% | 37,58% | 21,10% | 34,94% | 41,75% |
OSSR | 182,5 | -1,35% | -3,68% | 13,31% | 36,06% | 19,67% | 74,64% |
OMXI6ISK | 928,04 | -1,62% | -3,47% | 10,77% | 16,00% | 13,97% | 32,92% |
(Nasdaq OMX Nordic, 17. maí 2010)
Sveiflukennd vika er að baki á erlendum hlutabréfamörkuðum. Strax á mánudeginum hækkuðu helstu hlutabréfavísitölur um heim allan eftir að fréttir bárust af því að Evrópusambandsríkin hefðu samþykkt að stofna neyðarsjóð upp á 750 milljarða evra í samvinnu við Alþjóðagjaldeyrissjóðinn.
Tilgangur sjóðsins er að koma í veg fyrir að fjármálavandræði Grikkja breiðist út til annarra ríkja Evrópusambandsins þar sem skuldsett ríki innan sambandsins geta nú óskað eftir lánaaðstoð til sjóðsins.
Þrátt fyrir þessar fréttir lokuðu hlutabréfamarkaðir á neikvæðum nótum á föstudeginum og lækkaði til að mynda IBEX 35 vísitalan á Spáni um 6,6% og FTSE MIB vísitalan á Ítalíu um 5,3%.
Svo virðist sem
fjárfestar trúa ekki ennþá að grísk stjórnvöld geti staðið við
lánaskuldbindingar sínar til lengri tíma og má því búast við áframhaldandi
sveiflum á erlendum hlutabréfamörkuðum á komandi vikum.
Vísitölur | Lokagildi | Vika | 1 mán | 3 mán | 6 mán | Frá áram. | 12 mán |
Heimsvísitala (MSCI) | 1153 | 2,29% | -8,06% | -0,88% | -3,91% | -3,82% | 22,04% |
Þýskaland (DAX) | 6057 | 5,98% | -0,95% | 8,39% | 5,95% | 2,76% | 29,23% |
Bretland (FTSE) | 5263 | 2,77% | -7,43% | 0,77% | -0,54% | -1,77% | 22,29% |
Frakkland (CAC) | 3560 | 5,22% | -10,02% | -3,70% | -6,31% | -8,87% | 13,20% |
Bandaríkin (Dow Jones) | 10620 | 2,42% | -3,62% | 3,02% | 1,75% | 1,84% | 28,44% |
Bandaríkin (Nasdaq) | 1907 | 3,13% | -5,25% | 5,31% | 5,24% | 2,52% | 40,73% |
Bandaríkin (S&P 500) | 1136 | 2,30% | -4,74% | 3,29% | 2,28% | 1,85% | 28,63% |
Japan (Nikkei) | 10463 | 0,95% | -7,80% | -0,69% | 5,20% | -2,95% | 10,48% |
Samnorræn (VINX) | 88 | 6,62% | -4,53% | 7,03% | 11,30% | 10,70% | 37,16% |
Svíþjóð (OMXS30) | 985 | 4,36% | -4,96% | 5,77% | 3,48% | 4,88% | 30,51% |
Noregur (OBX) | 342 | 3,73% | -6,23% | 3,72% | 1,94% | -2,85% | 32,94% |
Finnland (OMXH25) | 2125 | 6,26% | -3,78% | 5,54% | 9,26% | 6,25% | 32,85% |
Danmörk (OMXC20) | 404 | 2,24% | 1,42% | 14,66% | 20,92% | 19,10% | 39,70% |
(Verðbreyting í viðkomandi mynt, Bloomberg, 17. maí 2010)
Krónan veiktist örlítið í liðinni viku og hækkaði gengisvísitalan um 0,26% og endaði í 221,55 stigum samkvæmt opinberu viðmiðunargengi Seðlabanka Íslands.
Mikil ólga er á mörkuðum sökum skuldavanda nokkurra ríkja í Evrópu. Gríðarstór björgunarsjóður sem Evrópusambandið og AGS hafa samþykkt að koma á fót hefur ekki náð að stoppa lækkunarhrinuna.
Evran er nánast í frjálsu falli gagnvart dollar og veiktist um 3,11% í vikunni og hefur lækkað um 9,5% á einum mánuði. Að björgunarpakkinn dugi ekki til að stöðva lækkunina, þrátt fyrir að töluverð leiðrétting hafi átt sér stað, bendir til þess að fjárfestar telji að enn sé óhreint mjöl í pokahorninu.
Krónan hefur staðið þetta nokkuð vel af sér en hefur þó gefið eftir eins og flestir gjaldmiðlar gagnvart Kanadadal og japönsku jeni. Sókn fjárfesta í þá gjaldmiðla er hefðbundin flóttaleið í óvissuástandi, en svissnenskur franki er vanalega einnig í þeim hópi en nú hafa fjárfestar forðast hann vegna tengsla við Evrópu.
Vísitala | Lokagildi | Vika | 1 mán | 3 mán | 6 mán | Frá áram. | 12 mán |
GVT ISK | 221,6 | 0,26% | -1,74% | -3,56% | -6,07% | -4,84% | -0,99% |
(Bloomberg, 17. maí 2010)
Markaðsfréttir Íslenskra verðbréfa eru unnar af starfsmönnum Íslenskra verðbréfa hf. Þær eru stutt samantekt og ber ekki að líta svo á að í þeim sé að finna allar tiltækar upplýsingar um þau viðfangsefni sem til umfjöllunar eru.
Við vinnslu fréttanna er stuðst við innlendar og erlendar upplýsinga- og fréttaveitur sem taldar eru áreiðanlegar, en einnig við opinberar upplýsingar, eigin úrvinnslu og mat starfsmanna á hverjum tíma. Íslensk verðbréf hf. ábyrgjast þó ekki nákvæmni upplýsinganna, áreiðanleika eða réttmæti þeirra.
Markaðsfréttirnar eru einungis birtar í upplýsingaskyni og skal því ekki litið á þær sem ráðleggingu/ráðgjöf um að ráðast eða ráðast ekki í tiltekna fjárfestingu eða tilboð um að kaupa, selja eða skrá sig fyrir tilteknum fjármálagerningum.
Ábyrgðarmaður Vikulegra markaðsfrétta Íslenskra verðbréfa er Björn Snær Guðbrandsson, forstöðumaður eignastýringar.