Vikulegar markaðsfréttir Íslenskra verðbréfa
Vikulega birta Íslensk verðbréf samantekt um þróun helstu eignaflokka undanfarna viku. Smelltu hér ef þú vilt skrá þig á listann.
Innlend skuldabréf
Löng verðtryggð skuldabréf hækkuðu um 1,31% í vikunni og stutt verðtryggð bréf hækkuðu um 0,45%. Löng óverðtryggð bréf hækkuðu um 1,16%.
Það var því töluverð hækkun á verði
ríkistryggðra bréfa í síðustu viku. Þessi mikli kaupáhugi kom í kjölfarið á
gjalddaga á stuttum ríkisbréfaflokki en á gjalddaga voru tæpir 70 milljarðar.
Það sem vakti athygli var að kaupáhuginn var jafnt á stuttum óverðtryggðum
bréfum og löngum verðtryggðum bréfum.
Inn í þetta hefur trúlega spilað að fjárfestar reikna með að verðbólga verði heldur meiri í næstu mælingu (24. mars n.k.) en upphaflega var gert ráð fyrir.
Stýrivextir voru lækkaðir um 50 punkta sem var í efri mörkum þess sem flestir voru að spá en almennt voru greiningadeildir að reikna með 25-50 punkta lækkun.
Innlend hlutabréf
Aðra vikuna í röð hækkaði OMXI6ISK um meira en 3%, heildarvelta með bréf félaga í vísitölunni var í kringum 508 milljónir króna og er þetta talsvert meiri velta heldur en hefur verið síðustu vikur.
Mest var velta með bréf Marels fyrir 390 milljónir króna í 52 viðskiptum og hækkaði gengi félagsins um 9,7% í síðustu viku og nemur 12 mánaða hækkun nú 59%. Mest af hækkun þessa árs hefur komið á síðustu fjórum vikum. Gengi félagsins stóð í 63 þann 23. febrúar en lokaði s.l. föstudag í 77,8.
Sem fyrr eru það Marel og Össur sem flest viðskipti eru með á markaðinum. Í liðinni viku voru 83 af 125 viðskiptum á OMXI6ISK í þessum tveim félögum og næstum 96% af veltunni. Þetta eru einnig þau félög í OMXI6ISK með hæsta markaðsvirðið, Össur ríflega 83 ma.kr. og Marel ríflega 56,5 ma.kr.
Mest hækkuðu bréf Bakkavarar í síðustu viku um rúm 11%
en talsverðar sveiflur hafa verið á gengi félagsins eftir að tilkynnt var um að
félagið verði líklega afskráð af markaði á næstunni.
| Félög/vísitala | Lokagildi | Vika | 1 mán | 3 mán | 6 mán | Frá áram. | 12 mán |
| Bakkavör | 1,35 | 11,11% | -25,00% | -23,08% | -6,25% | 4,90% | -25,00% |
| FO-AIR | 133 | -0,75% | -6,38% | -6,38% | -10,20% | -6,38% | -22,81% |
| FO-ATLA | 163 | -1,21% | 6,54% | 6,89% | -30,40% | 1,88% | -4,97% |
| FO-BANK | 159 | 0,63% | 9,66% | 24,22% | 13,57% | 22,78% | 40,71% |
| Marel | 77,8 | 9,73% | 24,48% | 25,89% | 32,22% | 24,68% | 59,10% |
| Össur | 183 | 2,52% | 14,02% | 21,19% | 49,39% | 18,45% | 92,63% |
| OMXI6ISK | 937,22 | 3,14% | 8,25% | 14,13% | 14,01% | 11,50% | 59,12% |
(Nasdaq OMX Nordic, 22. mars 2010)
Erlend hlutabréf
Í síðustu viku hækkuðu hlutabréfamarkaðir í Bandaríkjunum þriðju vikuna í röð. Hins vegar lækkuðu markaðir á föstudaginn eftir að óvæntar fréttir bárust frá Indlandi þess efnis að vextir yrðu hækkaðir þar í landi vegna hækkandi verðbólgu. Hafa menn nú áhyggjur af því að aðrir seðlabankar í Asíu munu gera slíkt hið sama til að kæla niður hagkerfi sín.
General Electric hækkaði mest fyrirtækja í Dow Jones vísitölunni í síðustu viku um 6%. Ástæðan fyrir hækkuninni er sú að stjórnendur reikna nú með að fyrirtækið hækki arðgreiðslur sínar árið 2011. Fjárfestar gera því ráð fyrir betri afkomu hjá félaginu á næsta ári og jafnvel að þetta sé vísbending um batnandi stöðu bandaríska hagkerfisins.
Hlutabréfamarkaðir
í Evrópu hækkuðu almennt í síðustu viku en líkt og í Bandaríkjunum þá lokuðu
þeir flestir á neikvæðu nótunum á föstudaginn.
Áhyggjur af fjárhagsstöðu Grikklands eru fjárfestum sem fyrr ofarlega í
huga. Telja menn nú meiri líkur en áður
á að Grikkir þurfi aðstoð frá Alþjóðagjaldeyrissjóðnum.
| Vísitölur | Lokagildi | Vika | 1 mán | 3 mán | 6 mán | Frá áram. | 12 mán |
| Heimsvísitala (MSCI) | 1197 | 0,31% | 4,47% | 2,71% | 4,15% | 1,91% | 50,74% |
| Þýskaland (DAX) | 5982 | 0,63% | 4,55% | 0,02% | 4,16% | -0,17% | 46,16% |
| Bretland (FTSE) | 5650 | 0,56% | 4,93% | 5,39% | 9,20% | 3,75% | 46,14% |
| Frakkland (CAC) | 3925 | -0,05% | 3,73% | -0,04% | 1,91% | -1,01% | 39,61% |
| Bandaríkin (Dow Jones) | 10742 | 1,11% | 3,45% | 2,65% | 9,28% | 3,01% | 47,59% |
| Bandaríkin (Nasdaq) | 1932 | 0,42% | 6,32% | 5,05% | 11,44% | 3,88% | 62,77% |
| Bandaríkin (S&P 500) | 1160 | 0,87% | 4,68% | 3,75% | 8,23% | 4,02% | 50,92% |
| Japan (Nikkei) | 10744 | 0,68% | 4,08% | 4,30% | 4,38% | 2,64% | 36,23% |
| Samnorræn (VINX) | 90 | 0,65% | 6,10% | 12,73% | 13,85% | 11,29% | 70,37% |
| Svíþjóð (OMXS30) | 1020 | 0,21% | 6,52% | 5,65% | 10,20% | 6,78% | 53,61% |
| Noregur (OBX) | 335 | -0,65% | 1,79% | -1,73% | 11,87% | -2,07% | 65,44% |
| Finnland (OMXH25) | 2214 | -1,05% | 6,21% | 10,38% | 10,93% | 8,50% | 67,06% |
| Danmörk (OMXC20) | 380 | 1,97% | 4,52% | 12,88% | 11,02% | 12,06% | 66,25% |
(Bloomberg, 22. mars 2010)
Krónan
Krónan styrktist í liðinni viku og lækkaði gengisvísitalan um 0,23% skv. opinberu viðmiðunargengi SÍ og endaði í 227,03 stigum. Krónan heldur því áfram að styrkjast þótt hægt fari.
Það gerðist tvennt í vikunni sem hefði getað lækkað
gengi krónunnar. Annars vegar voru stýrivextir lækkaðir um 50 punkta. Hins
vegar var lokagjalddagi ríkisbréfaflokks sem var að mestu í eigu erlendra
fjárfesta.
Eins og þekkt er þá geta erlendir aðilar valið á milli þess taka
vaxtatekjur úr landi eða endurfjárfesta fyrir þær í krónum. Vaxtatekjur vegna
þessa flokks voru nálægt 6 milljörðum og þar af áttu erlendir aðilar um 5
milljarða.
Þrátt fyrir þetta þá hreyfðist krónan nánast ekkert
í vikunni. Þetta bendir annars vegar til þess að gjaldeyrishöftin haldi mjög
vel og hins vegar til þess að erlendum fjárfestum líði betur með eignir í
krónum en áður var talið.
| Vísitala | Lokagildi | Vika | 1 mán | 3 mán | 6 mán | Frá áram. | 12 mán |
| GVT ISK | 227,55 | -0,23% | -1,16% | -3,79% | -2,55% | -2,26% | 13,89% |
Fyrirvari
Markaðsfréttir Íslenskra verðbréfa eru unnar af starfsmönnum
Íslenskra verðbréfa hf. Þær eru stutt samantekt og ber ekki að líta svo
á að í þeim sé að finna allar tiltækar upplýsingar um þau viðfangsefni
sem til umfjöllunar eru.
Við vinnslu fréttanna er stuðst við innlendar og erlendar
upplýsinga- og fréttaveitur sem taldar eru áreiðanlegar, en einnig við
opinberar upplýsingar, eigin úrvinnslu og mat starfsmanna á hverjum
tíma. Íslensk verðbréf hf. ábyrgjast þó ekki nákvæmni upplýsinganna,
áreiðanleika eða réttmæti þeirra.
Markaðsfréttirnar eru einungis birtar í upplýsingaskyni og skal því ekki litið á þær sem ráðleggingu/ráðgjöf um að ráðast eða ráðast ekki í tiltekna fjárfestingu eða tilboð um að kaupa, selja eða skrá sig fyrir tilteknum fjármálagerningum.
Ábyrgðarmaður Vikulegra markaðsfrétta Íslenskra verðbréfa er Björn Snær Guðbrandsson, forstöðumaður eignastýringar.